Ég heiti Birkir Ingibjartsson, er menntaður arkitekt og hef síðustu 3 ár starfað sem verkefnastjóri hjá borgarskipulagi Reykjavíkur. Þar hef ég tekið þátt í þróun skipulags á stórum og litlum uppbyggingarsvæðum í borginni. Ég var annar af tveimur fulltrúum borgarinnar við gerð frumdragaskýrslu Borgarlínu og hef í kjölfarið haft þau verkefni sem tengjast skipulagsgerð Borgarlínu á minni könnu.
Ég hef tekið virkan þátt í opinberri umræðu um skipulagsmál borgarinnar á síðustu árum, skrifað greinar, byggt tímabundnar innsetningar í miðborginni með hópnum Betristofa borgarinnar og var um stund meðþáttarstjórnandi í hlaðvarpinu Aðförin sem fjallaði um arkitektúr og skipulagsmál.
Ég er 35 ára gamall og er giftur Steinunni Björg Hrólfsdóttur fatahönnuði og eiganda fataverslunarinnar Andrá Reykjavík. Við eigum þrjú dásamleg börn, Fanney Ingu 16 ára, Áróru Ester 5 ára og Hrólf Breka 1 árs. Við erum búsett í Safamýri og erum því hluti af borgarhluta 5 - Háaleiti og Bústaðir.
Ég er uppalinn í Kópavoginum en hef frá því ég var tæplega tvítugur búið eða verið með annan fótinn í Reykjavík, helst eru þá frátalin þau tæpu fimm ár þegar við fjölskyldan bjuggum í Stokkhólmi. Þar tók ég mitt mastersnám í arkitektúr í KTH og Steinunn starfaði sem fatahönnuður á aðalskrifstofu H&M. Ég tók grunnnámið í arkitektúr við Listaháskóla Íslands á árunum 2009-2012 og smitaðist þar af miklum áhuga á arkitektúr og skipulagsmálum í Reykjavík. Þar áður lauk ég grunnnámi í umhverfis- og byggingarverkfræði við Háskóla Íslands en fann að því námi loknu að byggingarlistinn kallaði á mig.
Í frítíma mínum hef ég hef gaman að því að ferðast innanlands sem utan, fylgjast með eða spila fótbolta og hjóla um og skoða borgina okkar. Betri ferðamáta innan borgarinnar veit ég ekki og ég reyni að hjóla til vinnu allt árið um kring. Hjólið mitt er gamall racer sem ég keypti út í Stokkhólmi og ég viðurkenni fúslega að ég elska það. Yfir hörðustu vetrarmánuðina fær hjólið þó oft góða hvíld á köflum en þá reiði ég mig í staðinn á strætó til og frá vinnu.