Stjórnmálafólk samtímans verður að koma með raunhæfar lausnir í loftslagsmálum. Að þétta byggð, minnka umferð og gera borgarhluta sjálfbæra er eitt af því mikilvægasta sem sveitarstjórnarstigið getur lagt að mörkum í þessu samhengi.

Borgarlínan er mikilvægasta verkefni áratugarins á höfuðborgarsvæðinu. Mikilvægt er að stutt verði við verkefnið á öllum stigum og það framkvæmt af sama metnaði og settur hefur verið í undirbúning þess á liðnum árum.

Það hvernig borgin er skipulögð fléttast með margbreytilegum hætti inn í líf fólks. Tryggja þarf fjölbreytta búsetukosti og að í nýjum hverfum séu íbúðir fyrir tekjulægri hópa. Einnig þarf að fylgja því eftir að gæði byggðarinnar séu óháð búsetukosti. Borgarlínan mun umbylta aðgengi milli borgarhluta og jafna aðgengi að lífsgæðum borgarinnar.

Ég vil að fólk hafi frelsi og val þegar kemur að samgöngumátum. Það þarf að efla virka ferðamáta og stórbæta öryggi gangandi og hjólandi, setja þessa hópa í forgang. Öll framtíðarþróun verður að miða að því að draga úr vægi einkabílsins og minnka plássið sem hann hefur í borgarlandinu.

Þar sem er jafnt aðgengi, fjölbreytt mann- og dýralíf, gróður og gróska er gott að vera. Ég vil setja skýran ramma og gera kröfur þegar kemur að nýjum uppbyggingarverkefnum þannig að þau séu á forsendum verðandi íbúa og góðra búsetuskilyrða.

Það er mikilvægt að borgarkerfið eigi í virku samtali við hið gróskumikla fagsamfélag sem hér er í tengslum við þær miklu breytingar sem fyrirhugaðar eru á borginni okkar. Hönnun og arkitektúr eiga erindi í miklu víðara samhengi og þurfa að vera partur af öllum ferlum frá upphafi til enda.

Jafnt aðgengi að góðum tækifærum til menntunar og íþrótta- og tómstundastarfs er stórt atriði í að stuðla að auknum jöfnuði milli ólíkra hverfa borgarinnar og þeirra þjóðfélagshópa sem þar búa. Þessi mikilvæga nærþjónusta á eftir fremsta megni að vera í göngu- og hjólafjarlægð fyrir sem flesta. Það styrkir aðra nærþjónustu og eflir hverfisandann.